बागलुङकाे काठेखाेलामा पिकअप भ्यान दुर्घटना हुँदा २ जनाको मृत्यु भएको छ । जिल्लाको काठेखोला गाउँपालिका ५ बिहुँ ठुलढुङ्गामा पिकअप जिप दुर्घटना हुँदा २ जनाको घटनास्थलमै मृत्यु भएको जिल्ला प्रहरी कार्यालय बागलुङका प्रहरी नायव उपरीक्षक मदन केसीले जानकारी दिनु भयो।
गलकोटबाट बागलुङ बजारतर्फ आउँदै गरेको ग १ च ९४८५ नम्बरको पिकअप मध्येपहाडी लोकमार्गबाट ५ सय मिटर तल खसेको र मृतकको सनाखत हुन नसकेको केसीले बताउनुभयो ।
घटनास्थलमा प्रहरी र स्थानीयले खोजी एवं उद्धार गरिरहेको बताइएको छ । जिपमा कति यात्रु सवार थिए र मृतक को को हुन् भन्ने खुल्न सकेको छैन । घटनास्थल सदरमुकाम देखि करिब २० किलोमिटर पश्चिममा रहेको छ ।
प्रहरीले यसबारेमा अनुसन्धानपश्चात यथार्थ जानकारी छिटो उपलब्ध गराउने बताएको छ ।
