काठमाडौँ । नवलपरासी र कञ्चनपुरमा शुक्रबार भएको सवारी दुर्घटनामा दुई जनाको मृत्यु भएको छ । नवलपरासी बर्दघाट सुस्ता पश्चिमको सुनवल नगरपालिका–२ मा मोटरसाइक दुर्घटना हुँदा मोटरसाइकलमा सवार रामग्राम नगरपालिका १७ का ३४ वर्षीय शैलेश यादवको मृत्यु भएको छ । सोही दुर्घटनामा घाइते भएका २७ वर्षीय आशिषकुमार यादवको युनिभर्सल कलेज अफ मेडिकल साइन्स अस्पतालमा उपचार भइरहेको प्रहरीले जनाएको छ ।

प्रहरीका अनुसार प्रदेश ३ ०३–००१ प ४९६३ नम्बरको मोटरसाइक अनियन्त्रित भएर पल्टिएको थियो । चालक को परिचय नखुलेको प्रहरीले जानकारी दिएको छ । त्यसैगरी कञ्चनपुरको बेलौरी नगरपालिका ६ मा भएको ट्याक्टर दुर्घटनामा बेलौरी नगरपालिका ३ का ४५ वर्षीय शिवचरण चौधरीको मृत्यु भएको छ। मृतक चौधरी से १ त १८३५ नम्बरको खाली ट्याक्टर चालक रहेका थिए ।