गण्डकीमा कोरोना : अहिलेसम्म १७१९ संक्रमित, १५२० निको, ५ मृत्यु, २ दर्जन संक्रमित थपिए. गण्डकीमा कोरोना: अहिलेसम्म १७१९ संक्रमित, १५२० निको, ५ मृत्यु, २ दर्जन संक्रमित थपिए. मूलखबर संवाददाता पोखरा, ३२ साउन गण्डकी प्रदेशका ४ जिल्लामा पछिल्लो २४ घण्टामा कोरोना संक्रमित थपिएका छन् । गण्डकी प्रदेशको कास्की, तनहुँ, बागलुङ र लमजुङमा कार्यरत कर्मचारी र प्रहरीहरुमा कोरोना संक्रमण देखिएको हो । आजमात्र प्रदेशमा १६ जनामा संक्रमण पुष्टि भएको हो ।. गण्डकी प्रदेशमा अहिलेसम्म १ हजार ७ सय १९ जनामा संक्रमण पुष्टि भएको छ । त्यसमध्ये १ हजार ५ सय २० जना निको भएर घर फर्केका छन् । अहिलेसम्म गण्डकी प्रदेशमा ३४ हजार ३ सय २५ जनाको स्वाब परीक्षण गरिएको छ । १ हजार २ सय २२ जना क्वारेन्टिनमा छन् भने १ सय ९९ जना आइसोलेसनमा छन् । अहिलेसम्म ५ जनाको कोरोना संक्रमणबाट मृत्यु भएको छ ।. तनहुँको ब्यास नगरपालिका– १ मा एकै परिवारका ५ जनामा कोरोना संक्रमण पुष्टि भएको छ । ब्यास–१ भादगाउँ रतौली टोलमा एकै परिवारका ५ जनामा कोरोना संक्रमण पुष्टि भएको हो ।. प्रहरी दम्पत्तिको घरमा कोरोना संक्रमण देखिएको हो । श्रीमान लमजुङ र श्रीमती तनहुँमै कार्यरत प्रहरी हुन् । प्रहरी दम्पत्तिकी आमा आमाको पोखरा स्वास्थ्य विज्ञान प्रतिष्ठानमा उपचारका क्रममा कोरोना परीक्षण गर्दा संक्रमण पुष्टि भएको थियो । त्यसपछि परिवारका सदस्यमा कोरोना परीक्षण गरिएको थियो ।. ‘आमालाई कोरोना संक्रमण पुष्टि भएपछि परिवारका अरु सदस्यलाई पनि स्वाब परीक्षणका लागि बोलाइएको थियो,’ ब्यास नगरपालिकाका स्वास्थ्य प्रमुख प्रमोद सोतीले भने, ‘घरका ४ र आफन्त तथा सवारी चालकसहित ८ जनाले पोखरा गएर स्वाब दिँदा थप ४ जनामा कोरोना पोजेटिभ देखियो ।’ महिला कार्यरत प्रहरी कार्यालय तनहुँका २७ जना प्रहरीको सम्पर्क पहिचान गरी स्वाब नमूना संकलन गरिएको छ ।. पोखरामा १० संक्रमित थपिए. पोखरा महानगरपालिकामा एकै दिन १० जनालाई कोरोना संक्रमण पुष्टि भएको छ । पोखरा महानगरपालिकाका विभिन्न वडाका ३ महिला र ७ पुरुषमा कोरोना संक्रमण पुष्टि भएको हो । पोखरामा ८६ वर्षीया वृद्धामा पनि कोरोना संक्रमण देखिएको छ ।. संक्रमण पुष्टि भएकामध्ये २ जना भारत र युएईबाट फर्किएकाहरु हुन् भने केही कन्टयाक्ट ट्रेसिङ र फिबर क्लिनिकबाट आएकाहरु छन् ।. पोखराको वडा नम्बर १६ मा १ महिला र ३ जना पुरुषमा संक्रमण देखिएको छ । त्यसमध्ये १ जना विदेशबाट आएका हुन् भने ३ जना यसअघि संक्रमित व्यक्तिको सम्पर्कमा आएका हुन् ।. वडा नम्बर ५ मा ५३ वर्षीय एक महिलालाई संक्रमण पुष्टि भएको छ । पोखराको वडा नम्बर ८ मा २ जना, वडा नम्बर २६, २८ र ३२ मा १÷१ जना संक्रमित भेटिएका प्रदेश स्वास्थ्य निर्देशनालयले जानकारी दिएको छ । ८६ वर्षकी वृद्धा वडा नम्बर ३२ कि हुन् ।. बागलुङमा दुई जनप्रतिनिधिमा कोरोना संक्रमण. बागलुङका एक वडाध्यक्षसहित दुई जना जनप्रतिनिधिमा कोरोना संक्रमण पुष्टि भएको छ । स्वास्थ्य कार्यालय प्रमुख सुरज गुरौका अनुसार २८ गते स्वाब दिएका उनीहरुमा शनिबार कोरोना संक्रमण पुष्टि भएको हो ।. उनीहरुलाई हाल धौलागिरि अस्पतालको आइसोलेसनमा राखिएको छ । संक्रमित वडाध्यक्ष गाउँपालिकाको क्वारेन्टिन व्यवस्थापनमा खटिएको र अर्का जनप्रतिनिधि पछिल्लो समय चितवन, काठमाडौं, पोखरालगायतका ठाउँ पुगेको पाइएको जिल्ला स्वास्थ्य प्रमुख गुरौले जानकारी दिए ।. भानुमा कर्मचारीमा कोरोना. तनहुँको भानु नगरपालिकाका एक जना कर्मचारीमा कोरोना संक्रमण पुष्टि भएको छ । नगरपालिकामा कार्यरत ३० वर्षीय कर्मचारीमा संक्रमण पुष्टि भएको छ । उनी भानुमा सुरुमा संक्रमण देखिएका ठेकेदारसँग सम्पर्कमा आएका थिए । उनलाई ज्वरो आउने तथा कोरोना संक्रमणको लक्षणसमेत देखिएको भानुका स्वास्थ्य प्रमुख ऐश्वर्यचन्द्र भट्टराई जानकारी दिए ।. भानुमा निर्माण व्यवसायी हुँदै एक दिन एकै वडाका २० जनामा कोरोना संक्रमण पुष्टि भएको थियो । प्रहरी, मासु पसल, वर्कसप हुँदै समुदायका विभिन्न क्षेत्रमा कोरोना संक्रमण पुष्टि भएको हो । वडा नम्बर १ का २० जनामा संक्रमण देखिएपछि भानु नगरपालिका ३ दिनदेखि सिल गरिएको छ ।. आइतबार नै पर्वतको बिहादी गाउँपालिका वडा नम्बर ५ का ३५ वर्षीय पुरुषमा पनि संक्रमण देखिएको प्रदेश स्वास्थ्य निर्देशक विनोद विन्दु शर्माले जानकारी दिएका छन् ।.