सत्तारुढ दल नेकपाको स्थायी समिति बैठक जारी रहेका बेला दुई अध्यक्ष मध्ये एक अध्यक्ष तथा प्रधानमन्त्री के पी शर्मा ओलीले बालुवाटारमा भिन्नै भेला बोलाएपछि अर्का अध्यक्ष पुष्पकमल दाहाल प्रचण्ड र वरिष्ठ नेता माधव नेपाल झलनाथ खानल पक्षले पनि बुधबार साँझ तीस भन्दा वढि स्थायी समिति सदस्य सहभागि एक भेला गरी महत्वपूर्ण निर्णय गरेको छ ।

बुधबारको स्थायी समिति बैठक केहीबेर बसेर स्थगित भएपछि बसेको दाहाल–नेपाल समूहका नेताहरूको भेलाले प्रधानमन्त्री ओलीसहित सबैले पार्टी निर्णय मान्नै पर्ने निर्णय गरेको भेलामा सहभागि नेता भिम रावलले जानकारी दिएका छन् ।

बिहीबार स्थायी समिति बैठक बस्दैछ । प्रधानमन्त्री ओली सहमतिमा नआए बहुमतका आधारमा निर्णय लिने बताइएको छ ।

ललितपुरको झम्सीखेलस्थित एक होटलमा भएको भेलामा अध्यक्ष प्रचण्ड, वरिष्ठ नेताद्वय खनाल र नेपाल, उपाध्यक्ष वामदेव गौतम, प्रवक्ता नारायणकाजी श्रेष्ठ र सचिवालय सदस्य रामबहादुर थापालगायत समूहका स्थायी समितिका ३० भन्दा वढि सदस्यहरू सहभागी थिए । यही भेलाले विधानअनुसार पार्टी निर्णय मान्न प्रधानमन्त्रीलाई बाध्य बनाउने निष्कर्ष निकालेको हो ।

‘विधानअनुसार प्रधानमन्त्रीले पार्टी निर्णय मान्नुपर्छ भन्ने भेलाको मूल निष्कर्ष हो,’ भेलामा सहभागी नेता रावलले भने, ‘मान्नु भएन भने विधानअनुसार नै अगाडि बढ्छौँं।’ पार्टी विधानमा बहुमतको निर्णय अल्पमतले मान्नुपर्ने प्रावधान छ । उनले यस अघि पटक पटक भएका पाटीृका निर्णयहरु पालना नगरिएकाले यो अवस्था उत्पन्न भएको भन्दै अब जोसुकैले पनि पार्टीको निर्णय मान्ने पर्ने बाध्यकारी अवस्था सिर्जना गरिने बताए ।

यसअघि कुनै समूहमा नखुलेका सचिवालय सदस्य थापाले पनि ओलीले पार्टी निर्णय मान्नु पर्ने धारणा भेलामा राखेको उक सहभागी नेताले बताए । ‘यसरी नै पार्टी अगाडि बढ्दैन । अहिलेको लडाईं भनेको गुटको जित हुने कि पार्टीको जित हुने, क्रान्तिको जित हुने कि प्रतिक्रान्तिकारीको जित हुने भन्ने हो । एउटा निर्णयमा पुग्नैपर्छ’, भेलामा थापाले भनेका थिए ।

भेलामा ‘नेकपाभित्र उत्पन्न भएको समस्या, सरकार र पार्टीबीचको समस्या र आज नेपालको राजनीतिमा देखा परेका यी तमाम समस्याको कारण पार्टी अध्यक्ष एवं प्रधानमन्त्री केपी ओली नै भएको निष्कर्ष निकालिएको थियो । पार्टीलाई विचार र विधिबाट चलाइयो भनेमात्रै आन्दोलन र पार्टी जोगिन्छ । पार्टी निर्णय सबैले मान्नु पर्छ, पार्टी निर्णय नमान्ने नेता हुनै सक्दैन । सबै नेताहरूको बुझाई यत्ति हो,’ भेलामा सहभागि नेता नेपाल निकट अर्का एक नेताले भने । तस्विर श्रोत अनलाईनखबर