०७६ सालको माध्यमिक शिक्षा परीक्षा, कक्षा १० (एसइई)को आन्तरिक मूल्यांकनका आधारमा ग्रेडसिट दिनका लागि कार्यविधि बनाउन राष्ट्रिय परीक्षा बोर्डले कमिटी गठन गरेको छ ।

विद्यालयले गरेको आन्तरिक मूल्यांकनका आधारमा ग्रेडसिट दिने सरकारले गरेको निर्णय कार्यान्वयन गर्ने कार्यविधि बनाउन तीन सदस्यीय कमिटी बताएको हो ।

बिहीबार बसेको बोर्ड बैठकले सदस्यसचिव दुर्गा अर्याल, एसइईका परीक्षा नियन्त्रक रामराज खकुरेल र बोर्ड सदस्य सर्जनी जोशी रहेको तीन सदस्यीय कमिटी बनाएको अध्यक्ष प्रा.डा. चन्द्रमणि पौडेलले बताए । ‘हामीले मूल्यांकन यसरी गर भन्न पाइएन, एउटा फर्म्याट बनाएर मूल्यांकनलाई यसरी पठाइदिनु भन्ने हो,’ अध्यक्ष पौडेलले भने, ‘उहाँहरूले २-३ दिनमा कार्यविधि तयार गरेर बोर्डमा ल्याउनुहुन्छ  अनि परिपत्र गर्छौँ ।’

कोभिड– १९ को संक्रमण बढ्दै गएको र विद्यालयसमेत क्वारेन्टाइनका रूपमा प्रयोग भएकाले पहिलेजस्तै गरी परीक्षा लिन नसक्ने अवस्था भएपछि मन्त्रिपरिषद्ले ०७६ सालको एसइईको मात्र विद्यालयले गरेको आन्तरिक मूल्यांकनका आधारमा ग्रेडसिट दिने निर्णय गरेको हो ।

६ चैतमा हुने भनिएको एसइईका प्रश्नपत्र परीक्षा केन्द्रनजिकको चौकीमा पुगिसकेका थिए । कोरोना भाइरसको जोखिम बढेपछि एसइईको परीक्षा एक दिनअघि स्थगित भएको थियो । एसइईमा कुल चार लाख ८२ हजार दुई सय १९ विद्यार्थी छन् ।

एसइई परीक्षा स्थगित भएपछि चौकीसम्म पुऱ्याइएका प्रश्नपत्र फिर्ता गरी जिल्ला प्रहरी कार्यालय वा ‘क’श्रेणी इलाका प्रहरी कार्यालयमा राखिएको खबर नयाँ पत्रिकामा छ ।