काठमाडौं ,२२ वैशाख ।

आफ्नै पहलमा गठन भएको बर्तमान ओली सरकारलाई किन एमाओवादी आफैले ढाल्न खोज्दैछ भन्ने जिज्ञासा अहिले राजनैतिक बृतमा छाएको छ । एमाओवादी आफैंले प्रधानमन्त्रीमा सहमति जनाउँदै ओली नेतृत्वमा गएको बर्ष असोज २५ गते सरकार गठनमा सहयोग गरेको थियो । ओली सरकार गठन भएको अब ७ महिना पुरा हुँदैै गर्दा एमाओवादीले पदाधिकारीको बैठक बोलाएरै आफ्नो नेतृत्वमा राष्ट्रिय सहमतिको सरकार निर्माण गर्ने औपचारीक निर्णय गरेको हो ।

एमाओवादीले अध्यक्ष पुष्पकमल दाहाल प्रचण्डको नेतृत्वमा राष्ट्रिय सहमतिको सरकार बनाउने औपचारिक निर्णय गरेसंगै प्रकृतिमा बढेको सरगर्मीसंगै नेपाली राजनीतिमा पनि सरगर्मी बढेको छ । उसले एमाले, कांग्रेस, राप्रपा नेपाल लगायत सबै दललाई एमाओवादी नेतृत्वमा गठन हुने सहमतिको सरकारमा सहभागी हुन अपील समेत गरेको छ ।

प्रचण्ड निवास लाजिम्पाटमा बुधबार बिहानै बसेको एमाओवादी पदाधिकारीको बैठकले प्रचण्डको नेतृत्वमा सरकार बनाउने र यसका लागि सबै दललाई सार्वजनिक अपील गर्ने निर्णय गरेको थियो।

‘हामीले राष्ट्रिय स्वाधिनता, संविधानको कार्यान्वयन, शान्ति प्रक्रियाको पुनर्निर्माण लगायतका विषयलाई केन्द्रविन्दुमा राखेर केपी ओलीको नेतृत्वलाई समर्थन गरेका थियौं,’ पदाधिकारी बैठकपछि एमाओवादी उपाध्यक्ष नारायणकाजी श्रेष्ठले भने,’तर हामीले बारम्बार ध्यानाकर्षण गराउँदा पनि सरकारबाट काम भएन, त्यसैले हाम्रै नेतृत्वमा सहमतिको सरकार गठनका लागी अपील गर्ने निर्णय गरेका हौं  ।’

नेपाली कांग्रेसले एमाओवादीको नेतृत्वमा राष्ट्रिय सहमतिको सरकार बनाउन प्रस्ताव गरेको जानकारी दिँदै श्रेष्ठले यसमा अन्य दलहरुलाई आग्रह गरिएको बताए ।

बैठकपछि अध्यक्ष प्रचण्डद्वारा जारी विज्ञप्तिमा लेखिएको छ, ‘राष्ट्रिय स्वाधिनता एवम् स्वाभिमानको रक्षा, शान्ति प्रक्रियाको बााकी कार्यभार, राजनीतिक समस्यालाई वार्ताद्वारा समाधानसहित संविधान क्रियान्वयन र पुनर्निर्माणको कार्यलाई केन्द्रबिन्दुमा राखेर हाम्रो पार्टीले राष्ट्रिय सहमतिमा जोड दिँदै नेकपा (एमाले) को नेतृत्वको वर्तमान सरकार गठन गर्न पहल गरी सहभागी भएको हो ।

हाम्रो पार्टीले उपयुक्त विषयहरुमा लगातार सरकार एवम् एमाले नेतृत्वसँग गम्भीर ध्यानाकर्षण गराएका हौं । तर वर्तमान नेतृत्व अन्तर्गत सरकारले त्यस दिशामा परिणाममुखी कार्य अगाडि बढाउन सकेको देखिएन । यस स्थितिमा प्रमुख प्रतिपक्षी दल नेपाली कााग्रेसले समेत हाम्रो पार्टीको नेतृत्वमा सरकार गठन गरी उपरोक्त कार्यभार पुरा गर्न प्रस्ताव सहित सहमति जनाएको स्थितिमा हाम्रो पार्टी, नेकपा एमाले तथा राप्रपा नेपाल, जनअधिकार फोरम (लोकतान्त्रिक) लगायतका सबै पार्टीलाई हाम्रो पार्टीको नेतृत्वमा सरकार गठन गरी साझा कार्यभार पुरा गर्ने प्रक्रियामा अघि बढ्न अपील गर्दछ ।’

प्रचण्डद्धारा जारी प्रेस बिज्ञप्ती