काठमाडौं,१३ वैशाख ।

एकिकृत नेकपा माओवादी अध्यक्ष पुष्पकमल दाहाल प्रचण्डले ध्वस्त बनाएका भौतिक सम्पदाको पुनर्निर्माण कार्यलाई तीब्रताका साथ सम्पन्न गर्नुपर्ने बताएका छन् ।

ललितपुरमा आयोजित महा–विनासकारी भूकम्पको एक वर्षको स्मरणमा पुनर्निर्माण सम्बन्धी कार्यहरुको शुभारम्भ गर्ने कार्यक्रमलाई आज सम्बोधन गर्दै उनले यस्तो बताएका हुन् ।

उनले भने, ‘हाम्रा ऐतिहासिक धरोहर जो मानव सभ्यताको विकासको अभिव्यक्तिहरु हुन, राज्य र हामी बचेकाहरुको निम्ति चुनौति छन् कि भूकम्पको प्रतिरोधी धरोहर पूनर्निर्माण गर्न सक्छौं कि सक्दैनौं ।’ उनले पूनर्निर्माणको कार्य ढीलो भएको बताउँदै नेपाली जनताले निकै कठिनाई भोग्नु परेको उल्लेख गरे ।

जिम्मेवार राज्य र सचेत नागरिकले नै राष्ट्रिय एकतालाई मजबुत बनाउने र नयाँ निर्माणको कामलाई माथि उठाउने उनको भनाई थियो । उनले ‘पुनर्निर्माणको शुभारम्भ गर्दा आफूलाई भावुक र गम्भीर बनाएको बताए । नकरात्मक परिघटनाहरुलाई सकारात्मक रुपले पुनर्निर्माण गर्नुपर्ने प्रचण्डको धारणा छ ।