काठमाडौं, ६ वैशाख ।

घरेलु मैदानमा भएको विश्व क्रिकेट लिग च्याम्पियनसिप अन्तर्गत नामिवियाविरुद्धको दुवै खेल जितेर सम्पूर्ण नेपालीहरुलाई खुशी दिलाएको र विश्वकप खेल्ने सम्भावना कायम राखेको भन्दै उपराष्ट्रपति नन्दबहादुर पुन ‘पासाङ’ले नेपाली क्रिकेट टिम, प्रशिक्षक र सम्पूर्ण नेपालीहरुलाई बधाई दिएका छन् ।

उनका प्रेस संयोजकले जारी गरेको विज्ञप्तिमा उनले नेपाली क्रिकेट टिमलाई सन् २०१८ को विश्वकप यात्राको लागि शुभकामनासमेत दिएको जनाइएको छ ।

उनले साधन स्रोतको बाबजुत पनि राष्ट्रिय क्रिकेट टिमले उत्कृष्ट प्रदर्शन गरेर विनाशकारी भूकम्पले थलो परेर उठ्दै गरेका नेपालीहरुलाई खुशी दिनु राष्ट्रकै गौरव र प्रतिष्ठा भएको भन्दै सबै नेपालीलाई खुशी साट्न आग्रह पनि गरेका छन् ।