काठमाडौं, ६ वैशाख ।

जापानको क्युसुकेनलाई केन्द्रबिन्दु बनाएर २ पटकसम्म गएको शक्तिशाली भूकम्पबाट यस क्षेत्रमा बस्ने नेपालीहरु प्रभावित भएका छन् ।

भूकम्पमा परि एक नेपाली सामान्य घाइते भएका छन् भने एक नेपालीले सञ्चालन गरेको रेष्टुरेन्टमा क्षति पुगेको छ । नेपालको नवलपरासी जिल्ला गैडाकोटको विजयचोक घर भएका विष्णु पैडेलले १६ वर्षदेखि जापानको क्युसु क्षेत्रको कुमामोतोमा चलाएको एभरेष्ट किचन रेष्टुरेन्टमा क्षति पुगेको छ ।

नेपाली जनसम्पर्क समिति जापानका सभापति नारायण सुवेदीका अनुसार जापानबासी अरु सबै नेपाली भूकम्पबाट सुरक्षित छन् ।

सो भूकम्पमा परि मृत्यु हुनेको संख्या अहिलेसम्म ५० भन्दा बढी पुगेको छ । लगभग एक हजारजना घाइते भएका छन् भने ४० हजारभन्दा बढी प्रभावित भएका छन् ।