लमजुङमा उद्धार गरी डिभिजन वन कार्यालय परिसरमा ल्याइएको चितुवा पिँजडाबाट फुत्किएर आक्रमण गर्दा एक वनरक्षक घा इते भएका छन् । चितुवा फुत्किएपछि बेंसीसहर बजार क्षेत्रमा त्रास फैलिएको छ ।

चितुवाको आ क्रमणबाट डिभिजन वन कार्यालयमा कार्यरत ५७ वर्षीय वनरक्षक बुद्धिजङ गुरुङ घा इते भएका हुन् । उनको देब्रे हात र अनुहारमा चोट लागेको छ । प्रदेश अस्पताल बेंसीसहरमा उनको उपचार भइरहेको प्रहरीले जनाएको छ ।

बेंसीसहर नगरपालिका–११ चितीको तिलाहार–कार्कीडाँडा सडकअन्तर्गत धङ खोलामा बिहीबार दिउँसो अशक्त अवस्थामा चितुवा भेटिएको थियो । स्थानीयले चितुवा देखेपछि वडाध्यक्ष शिवप्रसाद जोशीलाई खबर गरेका थिए । त्यसपछि प्रहरी, स्थानीय र वन कर्मचारीको टोलीले चितुवाको उद्धार गरी अपराह्न डिभिजन वन कार्यालय बेंसीसहर पुर्‍याएको थियो ।

डिभिजनल वन अधिकृत शिव श्रेष्ठका अनुसार चितुवा बिरामीजस्तो अवस्थामा भेटिएको थियो । त्यसलाई कास्कीको पचभैयास्थित रेस्क्यु सेन्टर लैजाने तयारी थियो । कार्यालयमा ल्याइएको चितुवालाई अर्को पिँजडामा सार्ने क्रममा खोर भत्काएर फुत्किएको उनले बताए ।

खोर सार्ने क्रममा चितुवाले आक्रमण गर्दा वनरक्षक गुरुङ घाइते भएका हुन् । चितुवा नजिकै रहेका उनी आक्रमणपछि उद्धार गरी ल्याएको सवारीसाधनभित्रै एक घण्टाभन्दा बढी थुनिएका थिए ।