काभ्रे जिल्लामै लामो समयसम्म विकट क्षेत्रका रूपमा चिनिँदै आएको डाँडापारीकाे  महाभारत गाउँपालिका पछिल्लो समय विकासको नयाँ यात्रामा अघि बढिरहेको छ। भौगोलिक कठिनाइ, कमजोर पूर्वाधार र सीमित पहुँचका कारण पछि परेको यो गाउँपालिका अहिले भने समग्र विकासको उदाहरण बन्दै गएको छ। गाउँपालिकामा कान्छालाल जिम्बा सरकार प्रमुखका रूपमा अध्यक्षमा निर्वाचित भएपछि विकासका पूर्वाधारहरू तीव्र गतिमा निर्माण र विस्तार भइरहेका छन्।

सबैभन्दा उल्लेखनीय प्रगति सडक पूर्वाधारमा देखिएको छ। विगतमा वर्षायाममा पूर्ण रूपमा अवरुद्ध हुने कच्ची बाटाहरू अहिले स्तरोन्नति हुँदै कालोपत्रे र ग्राभेल सडकमा रूपान्तरण भइरहेका छन्। गाउँपालिकाका मुख्य बस्तीहरूलाई जोड्ने सडकसँगै वडास्तरका ग्रामीण सडकहरू विस्तार हुँदा स्थानीय बासिन्दाको दैनिक जीवन सहज बनेको छ। यसले कृषि उपजको बजार पहुँच बढाएको छ भने शिक्षा र स्वास्थ्य सेवामा पुग्न समेत सहजता ल्याएको छ।

जिल्लाकाे सदरमुकाम धुलिखेल र बनेपा मुख्य शहर तथा बजारमा आइपुग्न करिब १ दिनकाे यात्रा गर्नुपर्दछ । कच्ची बाटाे, भिर र पहाडी भेगमा बनेकाे सडक यात्रा धेरै जाेखिमपुर्ण छ ।त्यसकाे विकल्पमा हेटौंडा जाेड्ने सडक धेरै सहज र छाेटाे हुन सक्ने भएकाले वागमती प्रदेश सरकारकाे बजेटमा हेटौंडा जाेड्ने जनमुक्ति मार्ग निर्माण भइरहेको छ । याे मार्गलाई तत्कालीन जनमुक्ति सेनाकाे पैदल मार्गलाई सम्झना गर्दै राजमार्गको रूपमा निर्माण गर्न लागिएको हाे । काभ्रे जिल्लाकाे खानिखाेला गाउँपालिकाकाे सिक्रे दाेभानमा बागमती खाेलामा बन्न लागेकाे पुल निर्माणपछि हेटौंडा जाेड्ने जनमुक्ति मार्ग यस क्षेत्रकाे मुहार फेर्ने सडक बन्नेछ । याे करिब अन्तिम चरणमा पुगेको छ ।

विद्युत् पहुँचमा पनि महाभारत गाउँपालिकाले उल्लेखनीय फड्को मारेको छ। सबै बस्तीहरूमा राष्ट्रिय विद्युत् प्रसारण लाइन विस्तार गरिएको छ । विद्युत् विस्तारसँगै स्थानीय स्तरमा साना व्यवसाय सञ्चालन, कृषि प्रशोधन र घरेलु उद्योग प्रवर्द्धनमा सकारात्मक प्रभाव परेको छ।

खानेपानीको क्षेत्रमा पनि गाउँपालिकाले प्राथमिकताका साथ काम गरेको देखिन्छ। सुरक्षित खानेपानीको पहुँच नपुगेका बस्तीहरूमा लिफ्ट खानेपानी तथा एक घर एक धारा कार्यक्रममार्फत स्वच्छ पानी वितरण भइरहेको छ। यसले पानीजन्य रोग न्यूनीकरण गर्न मद्दत पुगेको छ भने महिलाहरूको दैनिकीमा समेत ठूलो राहत मिलेको छ।
स्वास्थ्य सेवाको सुधार महाभारत गाउँपालिकाको अर्को महत्वपूर्ण उपलब्धि हो। आधारभूत स्वास्थ्य चौकीहरू स्तरोन्नति गरिँदै स्वास्थ्यकर्मीको व्यवस्थापन, औषधि आपूर्ति र मातृशिशु स्वास्थ्य सेवामा सुधार गरिएको छ। गर्भवती महिला, ज्येष्ठ नागरिक र बालबालिकालाई लक्षित कार्यक्रमहरू प्रभावकारी रूपमा सञ्चालन भइरहेका छन्। यसले स्थानीयस्तरमै गुणस्तरीय स्वास्थ्य सेवा प्राप्त हुने वातावरण सिर्जना गरेको छ। गर्भवति महिलाहरूलाई प्रसुति गराउन कठिन अवस्था देखा परेमा गाउँपालिकाकाे समन्वय र पहलमा राष्ट्रपति महिला गर्भवती संरक्षण कार्यक्रममार्फत निशुल्क हेलिकप्टर सेवा दिन थालिएको छ । हालसम्म २ दर्जन बढी गर्भवती महिलाहरूकाे ज्यान बचाउनुका साथै सहज ढंगबाट सुत्केरी गराउन सफलता मिलेकाे छ ।

सूचना तथा सञ्चारको क्षेत्रमा पनि उल्लेखनीय परिवर्तन देखिएको छ। मोबाइल नेटवर्क विस्तार, इन्टरनेट पहुँच र डिजिटल सेवाको प्रयोग बढ्दै गएको छ। गाउँपालिकाले प्रविधिमैत्री सेवा प्रणाली अपनाउँदै नागरिकका गुनासा, सिफारिस र सूचना प्रवाहलाई सरल बनाएको छ।
समग्रमा, महाभारत गाउँपालिका आज विकासको नयाँ मोडमा उभिएको छ। अध्यक्ष कान्छालाल जिम्बाको नेतृत्वमा गरिएको योजनाबद्ध प्रयासले सडक, विद्युत्, खानेपानी, स्वास्थ्य र सूचना सञ्चार क्षेत्रमा अभूतपूर्व प्रगति हासिल भएको छ। यी विकास गतिविधिले स्थानीय जनताको जीवनस्तर उकास्नुका साथै महाभारत गाउँपालिकालाई समृद्धिको दिशातर्फ अघि बढाइरहेको छ।

त्यसैगरी यस गाउँपालिकाले महालेखा परिक्षककाे कार्यलयबाट हुने अनुगमन र मुल्यांकनमा गत वर्ष देशभरिकै एकमात्र बेरूजु शुन्य स्थानिय तह बन्न सफल बनेकाे छ । विकट क्षेत्रमा संघियताकाे कार्यन्वयन र कुशल नेतृत्व क्षमताबाट विकास र समृद्धि चुम्न सक्छ भन्ने गतिलाे उदाहरण बनेकाे छ महाभारत ।