व्यावसायिक फूल खेतीमा जुट्दै युवा. मूलखबर संवाददाता काठमाडौं नवलपुरमा व्यावसायिक फूल खेतीमा यहाँका युवाहरु जुटेका छन् । विगत पाँच वर्षदेखि स्थानीयस्तरमा सयपत्री फूलको व्यावसायिक रुपमा खेती गर्न युवा लागि परेका हुन् ।. तिहारलाई सप्तरंगी टीका र सयपत्री अनि मखमली फूलको माला लगाउने पर्वका रुपमा मान्ने गरिन्छ । तिहार नजिकिएसँगै बगैँचामा फुलेका फूलले तिहारको छुट्टै रौनकता बढएको छ ।. पछिल्लो समय हजारी, मखमली, गुरधौलीजस्ता फूलहरुको उत्पादनसँगै जिल्लामा तिहारका लागि महत्वपूर्ण मानिने सयपत्री फूलको बिक्री गर्न सुरु गरिएको छ । तिहार नजिकिएसँगै बजार झिलिमिलि देखिएको छ । प्राकृतिक मालाको व्यापार पनि राम्रो हुने व्यापारिहरुको भनाइ छ ।. कावासोती ३ का दिपक न्यौपानेको दैनिकि अहिले फूल बगैचामा बित्नेगरेको छ । न्यौपाने हरेक दिन बगैचामा फूलको हेरचाह गर्ने कार्यमा व्यस्त रहनुभएको छ । व्यावसायिक फूल खेती गर्नुभएका न्यौपाने विगत पाँच वर्षदेखि निरन्तर रुपमा लागि परेको बताउनुहुन्छ ।. कावासोती –३ गणेस टोलस्थित कावासोती गार्डेनमा उहाँले लगाएका सयपत्री फूल ढकमक्क फूलेका छन् । टेवलटेनिस जातको सयपत्री फूल तयार भएकाले बगैँचाबाटप्रति मालाको एकसय दरले लैजान सकिने उहाँ बताउनुहुन्छ । माग धेरै बढेकाले विगतका वर्षहरुमा पनि फूलबाट राम्रो आम्दानी भएको उहाँले बताउनुभयो ।. एक सिजनमा करिव एक लाखसम्म पनि आम्दानी गर्न सकिने हुँदा पनि व्यावसायिक फूल खेतीमा लागेको न्यौपानेको भनाइ छ । यस्तै, कावासोती –२ का विकास खड्काले पनि तिहारलाई लक्षित गर्दै सयपत्री फूल लगाउनु भएको छ । सानो थुङ्गा भए प्रतिमाला एकसय र ठुला थुङ्गा भए प्रतिमाला १२० रुपियामा बेच्ने तयारी भएको उहाँले बताउनुभयो ।. बाँझो रहेको जमिनलाई भाडामा लिएर कावासोती ९ मा सामूहिक फूल खेती गरिएको बाबुराम केसीले बताउनुभयो । फूलखेतीमा राम्रो सम्भावना भएकाले गत वर्षबाट जग्गा भाडामा लिएर सामूहिक फूल खेती गरिएको उहाँले बताउनुभयोे । तिहारका लागि भन्दै बर्षेनी करोडाँै रुपियाँ बराबरको फूल भारतबाट आयात गरिन्छ ।. कावासोती नगरपालिका उपप्रमुख फूलकुमारी थनेतले पालिकाभित्र १२ स्थानमा पुष्पखेती गरिएको बताउनुभयो । कावासोतीलाई आवश्यक पर्ने फूलमाला यहीको उत्पादनले पुग्ने विश्वास लिएको उहाँको भनाइ छ ।. हजारी, सयपत्री र मखमली जस्ता फूलहरुको व्यवसायिक खेति हुनु जनसंख्या बढ्दै जाँदा सयपत्री मालाको माग बढेको उहाँको भनाइ छ । जिल्लाको कावासोती, देवचुली, गैँडाकोट लगायतका क्षेत्रमा लगाइएका फूल व्यवसायिहरुको राम्रो आम्दानीको स्रोत भएको बताउँछन् ।.