लमजुङबाट समानुपातिक निर्वाचन प्रणालीमार्फत प्रतिनिधिसभा सदस्य बनेकी उर्मिला माझी पाैडेलले विकास निर्माणका काममा देखिएको ढिलासुस्ती हटाउन र समयमा काम सम्पन्न गरि जनतालाई प्रभावकारी सेवा दिनकाे लागि गरेकाे पहलपछि केही काम शुरू भएका छन् । सांसद माझीको सक्रिय पहल पश्चात् लामाे समयदेखि काम शुरू नभएर सास्ती खेपिरहेकाे भाेटेवडार बेलघारी सडक खण्डमा सडक सुधार र ढलान कार्य शुरू भएको छ । साे सडक सुधार कार्य उपभोक्ता समिति मार्फत काम शुरू गरिएको हाे ।   सांसद माझीले प्रमुख जिल्ला अधिकारी र पुर्वाधार प्रमुखलगायतसँग साे सडक ममर्म कार्य तत्काल गर्नकाे लागि निर्देशन गरेकाे २ दिनमै काम शुरू भएपछि स्थानिय उपभोक्ताहरू खुसि भएका छन् । निर्वाचनमा विजय भएपछि पहिलोपटक जिल्ला आएकी नेकपा माओवादी केन्द्रकी सांसद माझीले प्रमुख जिल्ला अधिकारी र पुर्वाधार प्रमुखलगायतसँग छलफल गर्दै विकासका कामहरू ताेकिएकाे समयमा नसक्दा जनताले असुविधा भाेग्न बाध्य हुनुका साथै जिल्लाकाे परिचय पनि विग्रने बताउँदै तत्काल काम गरेर परिणाम निकाल्न आग्रह गरेकी थिइन्।

साे सडक खण्डको निर्माण समयमा नहुँदा दाेर्दी गाउँपालिका र दुधपाेखरी गाउँपालिका जाने यातायात नराम्ररी प्रभावित हुने गरेकाे छ । प्रमुख जिल्ला अधिकारी सुशील बैधले यसलाई गम्भीरतापूर्वक लिएको र तत्काल काम अगाडि बढाउने बताएका थिए । साे खण्ड मर्मत र सुधारकाे लागि गण्डकी प्रदेश सरकारकाे १० लाख बजेट प्राप्त भएको छ भने आवश्यक थप बजेट व्यवस्थाकाे लागि सांसद माझीले पहल गर्ने बताएकी छीन् ।