कोरोनाको संक्रमण दिनदिनै बढ्दै गएपछि काठमाडौं उपत्यकामा थप कडाई गरिएको छ । दिनहुँ करिब डेढ सय संक्रमति थपिने र १० जनाको हाराहारीमा मृतकको संख्या थपिन थालेपछि उपत्यकामा कोभिड–१९ को सङ्क्रमण बढ्दै गइरहेको सन्दर्भमा जनस्वास्थ्यमा गम्भीर असर पर्न सक्ने अवस्थालाई मध्यनजर गर्दै जिल्ला प्रशासन कार्यालयले आजदेखि लागू हुने गरी विभिन्न गतिविधिमा निषेध गरेको छ ।

सङ्क्रमण रोकथाम तथा नियन्त्रणका लागि नेपाल सरकारले जारी गरेको स्वास्थ्य मापदण्डलाई कडाइका साथ पालना गराउन स्थानीय प्रशासन ऐन २०२८ को अधिकार प्रयोग गरी प्रमुख जिल्ला अधिकारी जनकराज दाहालले निश्चित गतिविधि निषेधको आदेश जारी गरेका हुन् । आदेश विपरीतका काम भएमा ऐन बमोजिम कारवाही गरिने जनाइएको छ ।

साउन ३१ देखि भदौ १५ सम्म काठमाडौँमा यी काम गर्न निषेध

• खुला स्थानमा भेला, भीडभाड र जुलुस,
• भीडभाड हुने गतिविधि : 
• जात्रा महोत्सव, पूजा तथा धार्मिक कार्यक्रम,
• उद्योग व्यापार व्यवसायअन्तर्गतका स्वास्थ्य मापदण्ड विपरीतका क्रियाकलाप,
• चाडपर्व तथा धार्मिक कार्यका लागि हुने जमघट गर्न 
• शैक्षिक संस्था सञ्चालन,
• सबै प्रकारका सभा, गोष्ठी, तालीम, सेमिनार,
• सिनेमा हल, पार्टी, प्यालेस, मनोरञ्जनस्थल,
• शैलुन, व्यूटी पार्लर, स्पा, स्वीमिङ पुल, जीमखाना,
• समूहमा खेलिने खेल,
• फुटपाथ, खुला ठाउँ, ठेलागाडा वा साइकलमा सञ्चालन हुने विभिन्न व्यवसाय तथा कवाड सङ्कलन
• पुस्तकालय, सङ्ग्रहायल, चिडियाखाना सञ्चालन गर्न 
• उद्योग व्यवसायका लागि स्वास्थ्य मापदण्ड विपरीत कामदार ओसारपसार गर्न,
• टेक वे बाहेकका होटल रेष्टुराँ सञ्चालन गर्न

आज बिहानदेखि लागू भएको उक्त आदेश आगामी भदौ १५ गतेसम्म जारी रहने जनाइएको छ ।