सत्तारूढ नेपाल कम्युनिष्ट पार्टी नेकपाका अध्यक्ष एवं पूर्वप्रधानमन्त्री पुष्पकमल दाहाल प्रचण्डले राजतन्त्रका पालामा गुमेको भूमि गणतन्त्रले फिर्ता ल्याइछाड्ने बताएका छन् ।

प्रतिनिधिसभामा नेपालको संविधाद दोश्रो संसोधनमाथिको दफावार छलफलमा बोल्दै उनले राजतन्त्रले नेपाली भूमि गुमाएको र त्यो गणतन्त्रले फिर्ता लिने ठाउँमा आइपुगेको बताएका हुन्।

‘राजतन्त्रले गुमाएको भूमि गणतन्त्रले फिर्ता लिने ठाउँमा आइपुगेका छौं,’ उनले भने, ‘गुमेको भूमि फिर्ता लिने नयाँ चरणमा हामी आइपुगेका हौं। राजतन्त्रले गुमायो, गणतन्त्रले उक्त भूमि फिर्ता लिँदैछ। ऐतिहासिक गौरव सदनलाई प्राप्त हुँदैछ।’

प्रचण्डले नेपालले भारत र चीनसँग संतुलित सम्बन्ध चाहेको बताए। नेपालको राष्ट्रिय मुद्दामा एकठाउँमा हुने सावित फेरि एकपटक विश्वसामु देखाएर सन्देश दिएको उनले बताए। प्रचण्डले राष्ट्रिय सहमतिका लागि पनि अपिल गरेका छन्।

प्रचण्डले संविधान संशोधनका लागि सहयोग गर्ने सबैलाई धन्यवादसमेत दिएका छन्।

प्रचण्डले भने, यो कुनै व्यक्ति विशेषले गर्ने कुरा मात्रै पनि होइन। राष्ट्रिय सहमति बनाएर मात्रै यस्ता कुरा टुंग्याउन यसअघि प्रधानमन्त्रीलाई सुझाव दिएको थिएँ,’

उनले अब कुटनीतिक र राजनीतिक संवादबाट भूमि फिर्ता ल्याइने पनि बताए। लिपुलेक विवादित क्षेत्र भनेर भारतले पनि स्वीकार गर्दै आएको प्रचण्डको भनाइ छ।

भारतसँग नेपालले कुनै दुश्मनी नराख्ने उनले बताए। ‘यो समस्या सधैंका लागि समाधान गर्न सबै नेता गम्भीर छौं। यो परिस्थिति आउनुअगाडि नै वार्ताबाट समस्या समाधान गर्न पाएको भए हुन्थ्यो। हाम्रोतर्फबाट अधिकतम प्रयास गरिएको हो,’ प्रचण्डले भने, ‘भारतसँग मित्रता चाहेका छौं। आवेगमा छैनौं। नक्सा जारी गर्नु भनेको भारतसँग दूरी बढाउनु होइन।’

प्रचण्डले भारतसँग आफूले पटकपटक वार्ताको प्रयास गर्दा पनि वातावरण तय नभएकाले आजको दिन आएको बताएका छन् ।

उनले यसैलाई वार्ताको बिन्दु मानेर भारतसँगको सम्बन्ध अगाडि बढाउन नेपाल तयार रहेको बताएका हुन् ।

नेपालले वार्ताको प्रयास गरिरहँदा बन्दाबन्दीको समयमा भारतका एक जना मन्त्रीले बाटो उद्घाटन गरेर नेपालीलाई चुनौती दिएजस्तो भयो । त्यसले हामीलाई एक हुन बाध्य बनायो, प्रचण्डले संसदमा भने ‘तपाईंहरूले घच्घच्याएकोमा धन्यवाद दिन चाहन्छौ। हामीले फेरि पनि भारतसँग दुष्मनि चाहेको छैनौं, वार्ता र सम्वाद चाहेका छौं ।’

प्रचण्डले नेपालले भारतसँगको सिमा विवाद सधै.का लागि हल गर्न चाहेको र कुटनीतिक वार्ताको माध्यमबाट सबै समस्या समाधान गर्न सकिने विश्वास पनि रहेको बताए ।