लिवर्टी इनर्जी कम्पनी लिमिटेडकाे २५ मेगावाटको माथिल्लो दोर्दी ‘ए’ जलविद्युत आयोजनाले स्थानीयका लागि छुट्याएको सेयर आवेदन आज (मंगलबार) बाट खुल्ला गरेको हो । लिवर्टी इनर्जी कम्पनी लिमिटेडले स्थानीयका लागि सेयर आवेदन खुल्ला गरेको छ

प्रतिकित्ता सय रुपैयाँ अंकित १५ करोड रुपैयाँ मूल्य बराबरको १५ लाख कित्ता सेयर निष्कासन गरिएकाे कम्पनीले जनाएको छ ।  कम्पनीका अनुसार निष्कासन भएको सेयरमध्ये ५ लाख कित्ता (३३.३३ प्रतिशत) अति प्रभावित दोर्दी गाँउपालिकाको वडा नम्बर ६ र ७ का स्थानीयका लागि छुट्याइएको छ ।

५ लाख कित्ता (३३.३३ प्रतिशत) दोर्दी गाँउपालिकाका बाँकी वडा र बेंशिसहर नगरपालिकाको वडा नम्बर ११ का स्थानीय र बाँकी (३३.३३ प्रतिशत) ५ लाख कित्ता जिल्लाबासीका लागि छुट्याइएको छ ।

आयोजनामा लगानी गर्न इच्छुक लगानीकर्ताले छिटोमा चैत्र ११ र ढिलोमा चैत्र २६ गतेसम्म आवेदन दिनुपर्नेछ । स्थानीयले न्युनतम १० देखि अधिकतम १० हजार कित्तासम्म आवेदन दिन पाउनेछन् । कम्पनीले सेयर निष्कासन गरी बाँडफाँड गर्न एनआइबीएल क्यापिटललाई बिक्री प्रबन्धक तोकेको छ ।

पहिलो चरणमा स्थानीयलाई सेयर निष्कासन गरेर बाँडफाँड गर्ने प्रक्रिया पूरा भएपछि दोस्रो चरणमा सर्वसाधारणका लागि छुट्याएको सेयर निष्कासन गरिने कम्पनीले जनाएको छ ।

कम्पनीले निर्माण गरिरहेको आयोजना ९६ प्रतिशत पूरा भएको छ । आयोजनाबाट आगामी चैत्रदेखि विद्युत उत्पादन सुरु गर्ने लक्ष्य छ । बाँध र विद्युतगृहको निर्माण अन्तिम चरणमा पुगेको छ । आयोजनाले उत्पादन गर्ने विद्युत विद्युतगृह नजिकै निर्माण भएको १३२ केभी किर्तीपुर  सबस्टेसनमा जोडिनेछ । आयोजना सम्पन्न हुँदा ४ अर्ब ६३ करोड रुपैयाँ खर्च हुने अनुमान गरिएको छ ।