सिरियाली सेनाको कारबाहीमा कम्तीमा ९८ सर्वसाधारणको मृत्यु , कारबाही रोक्न राष्ट्रसंघको आग्रह

149 Hits

सिरिया,

सिरियाली सेनाको कारबाहीमा कम्तीमा ९८ सर्वसाधारण मारिएका छन् । राजधानी दमास्कसबाट केही किलोमिटर टाढा रहेको पूर्वी घोउटा क्षेत्रमा सेनाको कारबाहीमा ती सर्वसाधारण मारिएका हुन् । सेनाले गरेको हवाई फायर र रकेट हमलामा ती सर्वसाधारण मारिएको सिरियन अब्जरभेटरी फर ह्युमन राइट्सले जनाएको छ । मृत्यु हुनेमा २० बालबालिका छन् । आइतबारदेखि सुरु भएको सेनाको कारबाही अहिले पनि जारी रहेको जनाइएको छ । सेनाले विद्रोहीको पकड रहेको पूर्वी घोउटालाई घेरा हालेर आक्रमण गरेको हो । सेना स्थलगत रूपमा पनि सो क्षेत्रमा अगाडि बढेको अन्तर्राष्ट्रिय समाचार संस्थाहरूले जनाएका छन् ।

राष्ट्रसंघको चिन्ता
राष्ट्रसंघले आक्रमणप्रति चिन्ता व्यक्त गरेको छ । सो क्षेत्र नियन्त्रणबाहिर रहेको जनाउँदै सेनालाई कारबाही रोक्न पनि राष्ट्रसंघले आग्रह गरेको छ । पूर्वी घाउटामा झन्डै चार लाख मानिस बसोवास गर्छन् । सो क्षेत्र सन् २०१३ देखि विद्रोहीको नियन्त्रणमा थियो । राजधानी दमास्कसबाट नजिक रहेको र विद्रोहीको नियन्त्रणमा रहेको अन्तिम क्षेत्र हो । पूर्वी घोउटामा मानवीय पीडा अन्त्य गर्न आवश्यक भएको राष्ट्रसंघको क्षेत्रीय मानवीय संस्थाका संयोजक पानोस मोउमटिजले बताए । ‘सो क्षेत्रका अधिकांश बासिन्दालाई थोरै विकल्प छ । उनीहरू आफ्ना नानीबाबु लिएर बेसमेन्ट र भूमिगत बंकरमा आश्रय लिएका छन्,’ उनले भने ।

सेनाको आक्रामक कारबाही
दुई साताअघि मात्र सिरियाली सेनाले सो क्षेत्रलाई आफ्नो नियन्त्रणमा लिने अभियान सुरु गरेको थियो । सो क्रममा सयौँ सर्वसाधारणको मृत्यु हुनुका साथै दर्जनौँ घाइते भएका थिए । सो क्षेत्रमा बसोवास गर्ने सर्वसाधारणको आपूर्ति सहज बनाउन केही साताअघि युद्धविराम घोषणा गरिएको थियो । यसैबीच, उत्तरी सिरियामा टर्कीका फौजविरुद्ध लडेका कुर्द लडाकुलाई सहयोग नगर्न टर्की सरकारले चेतावनी दिएको छ ।

वर्षौंपछिको विनाशकारी बम
पूर्वी घोउटामा भएको हमलालाई वर्षौंपछिकै विनाशकारी हमला बताइएको छ । सेनाले सर्वसाधारणका अतिरिक्त उनीहरूका आश्रयस्थल, बेकरी, गोदाम र खाद्यभण्डारलाई समेत निसाना बनाएको छ । सर्वसाधारणले एलेप्पोमा जस्तै अर्को विनाशकारी हमला सामना गरेको बताएका छन् । सो क्षेत्रमा सहयोग र उद्धार कार्य प्रभावित पार्न, एम्बुलेन्स अवरोध गर्न मुख्य सडकलाई समेत निसाना बनाएको दातृ निकायका कार्यकर्ताहरूले बताएका छन् । सेनाले मुख्य सडकहरूलाई निसाना बनाएको छ । आक्रमणमा सो क्षेत्रका अस्पतालहरूसमेत ध्वस्त भएकाले आकस्मिक उपचारको अभावमा मृतकको संख्या बढेको छ । प्रसूति अस्पतालसहित चारवटा अस्थायी अस्पताल ध्वस्त बनेका छन् । विद्रोहीले दमास्कसबाट सेनाविरुद्ध मोर्टार हमला गरेका छन् । तर, सेनाले तीव्र हमला गरेको छ ।

सर्वसाधारणको दयनीय अवस्था
घोउटाभित्र रहेको हामोरिअ सहरमा सार्वजनिक गरिएको भिडियोमा हवाई हमलामा कम्तीमा पनि २० बालबालिका मारिएको देखाइएको छ । बम आक्रमणपछि धुलोले ढाकेको ध्वस्त भवनबाट मानिसहरू ज्यान जोगाउन भागेको भिडियो दृश्य देख्न सकिन्छ । विद्रोहीको पकड रहेको सो क्षेत्र गम्भीर अवस्थामा रहेको अन्तर्राष्ट्रिय दातृ निकायका संगठनहरूले डिसेम्बरमा जनाएका थिए । सो क्षेत्रमा खानेकुरा, इन्धन र औषधिको अभाव रहेको ती संगठनहरूले जनाएका थिए ।

दातृ निकायले बढाइचढाइ गरे
पूर्वी घोउटाको अवस्थालाई अन्तर्राष्ट्रिय दातृ निकाय र सञ्चारमाध्यमहरूले बढाइचढाइ गरेको रसियाली विदेशमन्त्री सर्जी लाभरोभले आरोप लगाएका छन् । ‘पूर्वी घोउटा र इड्लिबमा मानवीय समस्याको विषयलाई निकै उत्तारचढाव गरिएको छ,’ विदेशमन्त्री लाभरोभको भनाइ उद्धृत गर्दै अन्तर्राष्ट्रिय सञ्चारमाध्यमहरूले जनाएका छन् । सिरियाको गृहयुद्धलाई लिएर अन्तर्राष्ट्रिय समुदाय विभाजित छ । रसियाले सिरियाका राष्ट्रपति बसार अल असदको सेनालाई समर्थन गर्दै विद्रोहीविरुद्ध कारबाही गरेको छ । अमेरिकाको समर्थन विद्रोहीलाई छ ।

Related News

न्युजिल्याण्डमा विदेशीलाई घर बेच्न बन्देज

काठमाडौं, ३१ साउन । न्युजिल्याण्डको सदनले विदेशीलाई घर बेच्न प्रतिवन्ध लगाएको छ । नेदरल्याण्डको सरकारले पेश गरेको ऐनलाई पारित गर्दै…

जापानमा बाढी पहिरो: १०० को मृत्यु, ५० बढी वेपत्ता (अपडेट)

एजेन्सी/टोकियो । जापानमा बाढी र पहिरोमा परेर जापानमा कम्तिमा एक सय जनाको मृत्यु भएको छ । ५० जनाभन्दा बढी वेपत्ता छन्…

Comments are closed




मूलखबर मिडिया प्रालि / Regd. No:

अनामनगर, काठमाडौं

०१-४७७०२७६


अध्यक्ष- रामकुमार कार्की
प्रबन्ध निर्देशक – सन्तोष पौडेल
सम्पादक – संगिता खड्का
संवाददाता – एकराज खनाल,
व्यवस्थापक : पदम लामा
डेस्क – लिलाराज श्रेष्ठ
प्रदेश नं १ संवाददाता – मनोज भट्टराई
प्रदेश नं २ संवाददाता – महेश्वर अधिकारी
प्रदेश नं ३ संवाददाता- लिलाराज श्रेष्ठ
प्रदेश नं ४ संवाददाता- विमला अधिकारी